ആരോഗ്യമേഖലയിൽ നമ്മുടെ പഞ്ചായത്തിന് വലിയ പുരോഗതി കൈവരിക്കാൻ സാധിച്ചിട്ടുണ്ട്. തദ്ദേശസ്വയംഭരണസ്ഥാപനങ്ങളുടെ കീഴിൽ ആരോഗ്യമേഖല ചേർന്നപ്പോൾ മുകൾ തട്ടിന്റെ അനുമതികൾക്ക് കാത്ത് നിന്ന് കാലം കളയാതെ ആരോഗ്യരംഗത്തിന്റെ സേവനങ്ങൾ ജനങ്ങൾക്ക് ലഭിക്കുവാൻ സൗകര്യമായി. ഇതോടുകൂടി കേന്ദ്രസംസ്ഥാന സർക്കാരുകളുടെ സ്കീമുകളും കൂടി ചേർന്നപ്പോൾ ആരോഗ്യമുള്ള സമൂഹം എന്ന കാഴ്ച്ചപ്പാടിലേക്കുള്ള ദൂരം കുറഞ്ഞു വന്നു കൊണ്ടിരി ക്കുകയാണ്. എങ്കിലും ജാഗ്രതയോടുകൂടി സമീപിക്കേണ്ട പരിസര മലിനീകരണവുമായി ബന്ധപ്പെട്ട സാംക്രമികരോഗങ്ങൾ, വർദ്ധിച്ചുവരുന്ന ജീവിതശൈലി രോഗങ്ങൾ, കാലാവസ്ഥ വ്യതിയാനവുമായി ബന്ധപ്പെട്ട രോഗങ്ങൾ എന്നിവ ഗൗരവതരമായി പ്രത്യേകം ശ്രദ്ധിക്കേണ്ടിയിരിക്കുന്നു. അന്യസംസ്ഥാന തൊഴിലാളികളുമായി ബന്ധപ്പെട്ട സാംക്രമികരോഗങ്ങൾ, മദ്യം, മയക്കമരുന്ന് എന്നിവയുടെ ഉപയോഗം, മാനസിക പ്രശ്നങ്ങൾ, ആത്മഹത്യ എന്നിവയാണ് നിലവിൽ ഗ്രാമപഞ്ചായത്തിലുള്ള ആരോഗ്യ പ്രശ്നങ്ങൾ.